Edificio proxectado en 1927 por Jenaro de la Fuente Álvarez. Trátase dun edificio eclecticista academicista coa fachada principal simétrica e un corpo central saínte que rompe a planicie do conxunto. A porta principal está entre dúas pilastras e un lintel con aberturas laterais para iluminación natural. O corpo central elévase por enriba da cornixa cunha bufarda. Nela destaca un óculo sobre o van e un frontón partido neobarroco. Todas as plantas aparecen diferenciadas, aínda que nas catro altas e nos laterais do corpo central os vans divídense en tres, mediante piares na segunda planta e pilastras nas demais. Como ornamentación ten vasos, ménsulas, fileteados, acanalados, denticulados, medallóns, grilandas, etc.