Edificio proxectado en 1938 polo arquitecto Francisco Castro Represas. As obras de cantería foron feitas polo mestre canteiro Ángel García Martínez empregando o granito branco da serra de Castrelos e un acabado final de pulido. O máis destacable é a utilización de balcóns redondeados seguindo a forma do chafrán tamén redondeado nas primeiras plantas e que nas dúas últimas se fai poligonal elevándose sobre a liña da cornixa. A porta de acceso enmárcase nunha superficie acanalada verticalmente nos laterais e horizontalmente no lintel. As ventás enmárcanse tamén ente piares cilíndricos constituíndo a única decoración en todo o edificio.