Edificio proxectado en 1907 por Michel Pacewicz e Jenaro de la Fuente Domínguez. A súa arquitectura é ecléctica, feita debido ás achegas dos arquitectos máis famosos da época. Jenaro de la Fuente realizou o proxecto da disposición xeral do edificio, tanto a distribución de vans como a primeira planta. Pacewicz dirixiu a obra e introduciu sobre todo elementos decorativos. As súas dúas fachadas son simétricas, cun chafrán cerrado, pilastras e, como remate unha bufarda. Ten balcóns saíntes moi decorados, ao igual que a cornixa e os linteis. A ornamentación é principalmente de elementos xeométricos pero tamén naturalistas.