GALICIA BATE A SÚA PROPIA MARCA E REPITE LIDERADO EN EUROPA.

Unha de cada catro praias con bandeira azul está na Comunidade galega; ademais dez portos, fronte aos cinco do pasado ano, logran tamén o recoñecemento internacional.

Galicia consolida o seu liderado en Europa en canto ás praias e portos con bandeiras azuis, xa que este verán lucirán este distintivo de calidade 122 areais e dez portos, o que supón oito bandeiras máis que o ano pasado. A Comunidade acapara a cuarta parte do total dos distintivos concedidos a praias españolas segundo os criterios de calidade das augas de baño, información, xestión ambiental e seguridade e servizos aos usuarios e volve encabezar a listaxe estatal (un total de 521), a gran distancia do segundo clasificado, a Comunidade Valenciana (96).

Novos areais distinguidos
Respecto ao verán pasado, Galicia ofrecerá tres areais máis con bandeira azul, de forma que na provincia de Pontevedra haberá 51 praias con insignia, na da Coruña 49 e na de Lugo, 22.
Entre os areais que gañan este emblema este verán cóntanse os de: O Muiño na Guarda; Os Frades en Baiona; Figueiras, nas Illas Cíes (Vigo); Melide, en Cangas; e Cabeceira, en Poio, todas en Pontevedra. Pola súa banda, na Coruña gañan este recoñecemento A Retorta e Saltiño-Barraña-Esquerda, no municipio de Boiro; Saíñas, en Carballo; Aguieira e Caveiro, en Porto do Son; Langosteira, en Fisterra e Esteiro, en Mañón. En Lugo, o municipio de Foz gaña un distintivo para a praia de Arealonga.

Sanxenxo, o municipio con máis insignias
Por oitavo ano consecutivo, o municipio con maior volume destes distintivos é Sanxenxo (Pontevedra), onde a bandeira azul ondeará en 13 areais, os mesmos que na campaña estival de 2009. Séguenlle o concello de Vigo, con oito bandeiras, mentres que con sete insignias cada un, sitúanse os municipios lucenses de Foz e Barreiros.

Portos deportivos
Nesta edición, o maior pulo correspondeulle aos portos deportivos, xa que Galicia duplicou o número de instalacións coa insignia ao pasar de cinco a dez.
A notable progresión, segundo a Asociación de Educación Ambiental y del Consumidor (Adeac), debeuse en boa parte á colaboración que se levou a cabo entre a entidade e o organismo Portos de Galicia, dependente da Xunta de Galicia, para favorecer a promoción da iniciativa. Respecto das distincións temáticas, Adeac premiou a Cangas polos seus servizos de salvamento e socorrismo. Só outros dous municipios españois, Sagunto (Valencia) e Cartaxena (Murcia), lograron tamén o recoñecemento.

Datos en España
En total, España obtivo 605 bandeiras azuis, 493 en praias e 78 de portos deportivos, en 2010.
As cifras mantéñeno á cabeza dos 33 países participantes do hemisferio norte, o que significa que unha de cada seis bandeiras do total das 3.511 concedidas na rexión ondearán en España.
O país recibe nesta edición 34 bandeiras máis que no pasado 2009.