Unha oportunidade de descubrir coa nosa bicicleta unha terra marcada polos ríos Miño e Sil que, ao seu paso entre as montañas, van moldeando unha das paisaxes máis espectaculares de Galicia.

O Centro BTT Ribeira Sacra atópase no Canón do río Sil, no límite das provincias de Lugo e Ourense. Oito percorridos circulares e 160 quilómetros de diferentes niveis de dificultade, que permiten coñecer os municipios da Teixeira, Castro Caldelas, Nogueira de Ramuín e Parada de Sil.

Un territorio cunha atmósfera máxica para coñecer lugares tan especiais como Santo Estevo de Ribas de Sil, un mosteiro totalmente rehabilitado e integrado na rede de Paradores Nacionais, o mosteiro de Santa Cristina de Ribas de Sil, localizado nun fantástico bosque de castiñeiros coñecido como o Souto de Meiral, e o centro histórico do Castro de Caldelas, declarado conxunto histórico artístico en 1998 onde destaca o Castelo dos Condes de Lemos.

Déixate levar polo encanto da Ribeira Sacra, polas súas espectaculares paisaxes de bosque autóctono, polos impresionantes canóns dos ríos Sil e Mao, polas vilas de montaña e polo románico das igrexas e mosteiros. Coñece a historia e o patrimonio etnográfico das súas vilas. Goza da súa gastronomía, acompañada dos seus afamados viños con denominación de orixe, goza dos seus viñedos en socalcos cultivados nun empinado sistema de bancais e, sobre todo, goza de esta terra escollida desde a antigüidade como lugar de retiro e entretemento.

Arriba
Axúdanos a mellorar!