Esta interesante rota descorre por camiños de carro e sendas, no concello ourensán de Parada de Sil, entre coidadas viñas, centenarios soutos e antigas carballeiras visitando o magnífico Canón do Sil e os seus preciosos miradoiros.

Os fornos, sequeiros e muíños mostran a humanización dunha natureza aínda salvaxe e que agacha coma un pequeno tesouro unha das marabillas históricas deste canón: o singular Mosteiro románico de Santa Cristina de Ribas de Sil.

A situación central da variante PR-G 98.1, entre Parada de Sil e Fondo de Vila, permite que a rota poida ser realizada reducindo o percorrido na metade do seu trazado. Así, un breve camiño entre a Praza do Barquilleiro, na capital municipal, e a aldea de Fondodevila, permite acurtar o noso agradable paseo.

Sobre todo, mentres observamos estas terras sobre o río Sil, non hai que deixar pasar a oportunidade que gozar da gastronomía e dos bos viños de esta tranquila comarca.