Galicia recibiu 8,8 millóns de visitantes nos once primeiros meses de 2011

De xaneiro a novembro, a comunidade galega rexistrou un total de 3.571.162 viaxeiros aloxados en establecementos de turismo regrado, segundo os datos do Instituto Nacional de Estadística (INE), o que supuxo un 5.9% máis respecto ao mesmo período do pasado Ano Santo.

Galicia rexistrou tamén a chegada de 5.237.911 excursionistas estranxeiros, segundo os datos de Frontur, que analiza os movementos en fronteira, e que supoñen un 22,6% máis en relación aos recibidos no ano 2010.

Galicia recibiu nos once primeiros meses do ano un total de 8.809.073 visitantes, un 5,9% máis respecto ao mesmo período do pasado Ano Santo. Os últimos datos do Instituto Nacional de Estadística (INE) revelan que a nosa comunidade recibiu no período que vai de xaneiro a novembro deste ano un total de 3.571.162 viaxeiros aloxados en establecementos de turismo regrado, á espera de coñecer a final de ano os últimos datos da oferta extrahoteleira no mes de novembro.

 Analizando a oferta hoteleira e extrahoteleira por separado, o informe do INE revela que se contabilizaron dende comezos de ano e ata novembro nos establecementos hoteleiros un total de 3.178.270 viaxeiros. Os datos para os establecementos extrahoteleiros (apartamentos turísticos, campamentos e establecementos de turismo rural) corresponden de momento ata o mes de outubro, e suman un total de 392.892 viaxeiros.

 A estas cifras hai que engadir o número de excursionistas estranxeiros que chegaron a Galicia e que, segundo os últimos datos de Frontur, que analiza os movementos en fronteira, suman un total de 5.237.911. Este dato supón un 22,6% máis respecto dos recibidos no ano 2010. A maioría deles son excursionistas procedentes de Portugal (93,3%) e realizan a viaxe en vehículo propio (99,7%).

 Novembro

Respecto da conxuntura turística do mes de novembro, Galicia rexistrou un total de 617.669 viaxeiros, un 10,7% máis respecto do mesmo período do ano anterior. En total, o número de viaxeiros da oferta de turismo regrado foi de 211.884 viaxeiros. O cómputo xeral confórmano o número de excursionistas estranxeiros chegados á nosa comunidade nese mes, 405.785 segundo os datos de Frontur.

Máis de 8,2 millóns de visitantes chegaron a Galicia nos dez primeiros meses do ano

Galicia recibiu nos dez primeiros meses do ano un total de 8.228.454 viaxeiros, un 5,4% máis respecto ao pasado Ano Santo 2010. Esta cifra provén da suma dos 3.396.328 viaxeiros aloxados en establecementos galegos de turismo regrado máis os 4.832.126 excursionistas estranxeiros.

Nos dez primeiros meses de 2011 contabilizáronse en Galicia un total de 8.228.454 visitantes. Esta cifra, que supera nun 5,4% o dato rexistrado no mesmo período do Ano Santo 2010, provén da suma dos viaxeiros aloxados nos establecementos regrados da Comunidade máis os excursionistas estranxeiros chegados a Galicia. Así, de xaneiro a outubro, a comunidade galega rexistrou un total de 3.396.328 viaxeiros aloxados en establecementos de turismo regrado, segundo os datos facilitados polo Instituto Nacional de Estadística, e un total de 4.832.126 excursionistas estranxeiros, segundo os datos provisionais que manexa Frontur.

 En detalle, os últimos datos do Instituto Nacional de Estadística (INE) revelan que a nosa comunidade recibiu no período que vai de xaneiro a outubro deste ano un total de 3.396.328 viaxeiros aloxados en establecementos regrados, en particular, os establecementos hoteleiros (con datos ata o mes de outubro) e os extrahoteiros (polo momento cos datos dispoñibles ata o mes de setembro). Analizando as dúas partes por separado, o informe do INE revela que nestes dez meses se contabilizaron nos establecementos hoteleiros un total de 3.003.436 viaxeiros, mentres que nos establecementos extrahoteleiros (apartamentos turísticos, campamentos e establecementos de turismo rural) a cifra dispoñible ata o mes de setembro confirma que se rexistraron 392.892 viaxeiros, á espera de coñecer as cifras finais do último mes.

 A estas cifras hai que sumar o número de excursionistas estranxeiros que chegaron a Galicia e que, segundo os datos provisionais de Frontur, que mide o excursionismo estranxeiro, suman 4.832.126, cun crecemento do 21,6% respecto ao 2010. A maioría deles son excursionistas procedentes de Portugal.