A Xunta promociona o turismo de Galicia entre os operadores turísticos de Brasil, Arxentina e Chile

A Xunta de Galicia, a través de Turgalicia, da Secretaría Xeral para o Turismo, participará dende onte ata o xoves 17 de maio nas xornadas de promoción directa para os mercados emerxentes de América do Sur, ao obxecto de promocionar a oferta turística galega entre os operadores turísticos máis salientables de Brasil, Arxentina e Chile.

Nesta misión, organizada polo Instituto de Turismo de España, Turespaña, Turgalicia participará en tres xuntanzas de traballo cos operadores turísticos sudamericanos que se celebrarán en Sao Paulo, Bos Aires e Santiago de Chile.

A xira promocional comezou en Sao Paulo o día e rematará en Santiago de Chile.

Programa
O programa iniciouse cun almorzo con xornalistas especializados en Turismo e viaxes en Sao Paulo, ao que lle seguirá a xuntanza de traballo cos principais operadores turísticos brasileiros no Consulado Xeral de España.

Mañá, día 16 de maio celebrarase a xuntanza de traballo cos operadores turísticos arxentinos, no Pazo de San Miguel de Bos Aires. Nesta xuntanza tamén participarán xornalistas arxentinos especializados en Turismo.

Xa, o día 17 de maio, terá lugar o último encontro con operadores turísticos sudamericanos, nunha xuntanza que se desenvolverá no Club de Golf da capital chilena.

Mercados emerxentes
Con esta xira promocional, Turismo de Galicia mantén a súa aposta este ano pola difusión da oferta turística galega nos mercados emerxentes máis interesantes do panorama internacional. Así, Galicia participou ao longo do mes de marzo na feira Moscow International Travel & Tourism, o certame turístico máis importante dos que se celebran en Rusia.

Tamén para o mercado ruso, no mes de xuño, Turgalicia participará nunha misión turística organizada por Turespaña para promocionar o Turismo galego entre os operadores turísticos das cidades rusas máis importantes.

Neste ámbito, a Xunta de Galicia, a través de Turgalicia, tamén participou a finais do pasado mes de febreiro na feira Guangzhou International Travel Fair (GITF), que constitúe o mercado turístico máis importante do sur de China

Catro grupos de xornalistas e operadores internacionais percorren Galicia en abril para coñecer a súa oferta turística

Os participantes nestas viaxes organizadas pola Secretaría Xeral para o Turismo a través de Turgalicia visitarán varias vilas e cidades galegas

Catro grupos de xornalistas e operadores turísticos internacionais percorrerán ao longo do mes de abril varias vilas e cidades do territorio galego ao obxecto de coñecer a oferta turística de Galicia e prescribir os atractivos desta entre os lectores dos medios de comunicación e clientes das empresas turísticas participantes nestas viaxes de familiarización turísticas, organizadas pola Xunta de Galicia, a través de Turgalicia, da Secretaría Xeral para o Turismo.

Así, entre os días 15 e 18 de abril, dous xornalistas da revista Condé Nast Traveller, do Reino Unido, participarán nunha viaxe de familiarización organizada en colaboración coa Oficina de Turismo de España en Londres baixo o nome Relax no mar, ao obxecto de difundir entre o público británico os atractivos das zonas costeiras máis senlleiras de Galicia por medio dun suplemento especial que realizará esta publicación no seu número de verán.

Doutra parte, os mesmos días 15 e 18 de abril, o xornalista británico do Daily Telegraph visitará a cidade da Coruña para elaborar un traballo xornalístico sobre as guerras napoleónicas. Neste caso, centrarase na figura do heroe da batalla de Elviña John Moore e na oferta turística da cidade herculina.

Ademais xa no mes de maio, un colaborador da revista Signature, medio corporativo para socios de Diners Club, visitará a cidade de Santiago de Compostela, entre os días 15 e 17, para dar a coñecer a súa oferta turística entre os lectores desta publicación.

Operadores turísticos

Dentro das viaxes de familiarización previstas para este mes de abril, está tamén a visita dun grupo de axencias de viaxes organizada por Turgalicia en colaboración coa Oficina de Turismo de España en Milán e a empresa pública Paradores.

Estes axentes de viaxe italianos visitarán os paradores de Santiago de Compostela, Pontevedra, Cambados, Baiona e Santo Estevo de Ribas de Sil, ademais da oferta complementaria dos lugares onde están radicados estes establecementos turísticos.

Próximas viaxes de familiarización

Ao longo dos vindeiros meses visitará Galicia un grupo de xornalistas mexicanos que coñecerán a oferta enogastronómica da Comunidade galega, baixo o produto cabeceira da marca do Turismo de Galicia Paseando entre viñedos.

Dentro da estratexia de dar a coñecer os novos produtos da marca turística de Galicia, tamén está prevista a visita dun grupo de operadores turísticos alemáns que poderán coñecer o produto Lugares únicos.

Ademais, un grupo de xornalistas do sur de Alemaña visitarán Galicia para coñecer o produto cabeceira de marca Santuarios máxicos, e outro grupo de asociacións de amigos do Camiño de Santiago en Alemaña poderán coñecer a oferta de Turgalicia Bono Iacobus, que combina o Camiño de Santiago con estancias en aloxamentos de Turismo Rural de Galicia.

Recentemente, no pasado mes de marzo, nove axentes de viaxe asociados ao operador turístico británico Kiker Holydays e nove xornalistas franceses especializados en Turismo e estilo de vida, visitaron parte dos principais xardíns vinculados á Ruta da Camelia, así como a exposición da camelia que se celebrou en Vilagarcía de Arousa e as cidades de Santiago de Compostela e A Coruña.