Turismo de Galicia organiza un curso de coñecementos básicos para a visita turística en adegas galegas

Esta acción formativa, que se enmarca no Plan de Enogastronomía de Galicia, desenvolverase entre os meses de xullo e agosto vai dirixida a guías de Turismo de Galicia en activo, de xeito que poidan adquirir coñecementos en materia Turismo enolóxico

Turgalicia, da Secretaría Xeral para o Turismo, porá en marcha un curso de coñecementos básicos para a visita turística en adegas de Galicia, destinado a Guías de Turismo de Galicia en activo, de xeito que estes poidan adquirir coñecementos en materia de Turismo enolóxico.

Este acción formativa que está enmarcada no Plan de Enogastronomía de Galicia desenvolverase, entre os días 2,3 e 4 de xullo, no ámbito teórico e os días 27 e 29 de agosto, con prácticas nas adegas galegas.

O prazo de preinscrición para este curso está aberto desde o pasado 22 de xuño e estenderase ata as 14:00 horas do 28 de xuño. Para preincribirse nesta actividade cómpre consultar a web www.turgalicia.es no apartado de Calidade Turística e encher un formulario que se deberá enviar ao enderezo turcalidade@xunta.es

Obxectivos do curso
Entre os obxectivos xerais deste curso está facilitar aos guías de Turismo os coñecementos e as destrezas oportunas para dar información turística e realizar visitas guiadas de calidade e dotalas de contidos rigorosos e específicos sobre as Denominacións de Orixe de Galicia.

Polo que respecta aos obxectivos específicos, con esa actividade trátase de impulsar a cualificación dos profesionais do sector turístico e mellorar a competitividade das empresas participantes.

Ademais, preténdese crear novos servizos e actividades vinculadas ao turismo enogastronómico, mellorar a xestión da calidade dos servizos prestados, capacitar as industrias para a prestación de servizos de actividades turísticas e desenvolver a capacidade turística das empresas, complementando a súa actividade produtora, así como a estruturación de produtos turísticos individuais e conxuntos.

No ámbito teórico, o día 2 de xullo desenvolverase un relatorio sobre a introdución histórica á produción vinícola nas Rías Baixas, e outro relacionado coa viticultura nesta zona.

O día 3 de xullo, estudaranse os procesos de elaboración do viño e haberá unha explicación sobre a maridaxe entre comidas e viño.

Os día 27 e 28 de agosto realizaranse visitas ás adegas da Denominación de Orixe Rías Baixas e aos recursos turísticos da zona do Salnés.

A secretaría xeral para o Turismo presenta as grandes liñas do Plan de Enogastronomía de Galicia

Carmen Pardo destacou na conferencia do IV Evento Interregional WINETech, celebrada na Cidade da Cultura, que “unha das actuacións que recolle o Plan de Acción do Turismo de Galicia 2010-2013 é a incorporación da gastronomía galega no deseño de calquera produto turístico de Galicia”. Neste sentido, recordou algunhas actuacións levadas a cabo pola Xunta de Galicia como Millésime ou as Rutas do Viño.

A secretaria xeral para o Turismo, Carmen Pardo, ofreceu recentemente na Cidade da Cultura a conferencia ‘A enogastronomía como recurso turístico de Galicia’ na clausura do ‘IV Evento Interregional WINETech’, organizado pola Consellería do Medio Rural. A secretaria xeral destacou o turismo enogastronómico como “produto turístico singular, desestacionalizador e con alto compoñente cultural” e situou os obxectivos do Plan de Acción do Turismo de Galicia 2010-2013 no “impulso da competitividade da enogastronomía en Galicia e norte de Portugal, desenvolvendo produtos turísticos de calidade baseados na identidade de ambos territorios e vinculados á súa tradición culinaria”.

Ademais, presentou as grandes liñas do recén redactado Plan de Enogastronomía de Galicia, que conta con cinco eixos de actuación e 18 accións, entre as que destacou a creación dun mapa enogastronómico por xeodestinos, a creación dun merchandising e packaging innovador ou o programa de prescriptores e embaixadores.

Na súa intervención, Carmen Pardo destacou os valores da gastronomía galega e subliñou como en Galicia “temos a maior variedade de produtos do mar do mundo, somos o primeiro produtor e consumidor español de peixe, e temos máis de 500 indicacións xeográficas protexidas que impulsan o sector turístico e promocionan os produtos con indicación de calidade”. Ademais, a secretaria xeral indicou que “a gastronomía é a segunda motivación despois da natureza que fai que os turistas elixan a nosa comunidade como destino”. Carmen Pardo subliñou a importancia desta estatística, xa que “máis de a metade da poboación española afirma que a gastronomía e o viño inflúen á hora de escoller destino nas súas viaxes”. Incidiu tamén no elevado gasto do turista de enogastronomía en relación coa media, así como o alto grado de desestacionalización.

Segundo informou a secretaria xeral, “unha das actuacións que recolle o Plan de Acción do Turismo de Galicia 2010-2013 é a incorporación da gastronomía galega no deseño de calquera produto turístico de Galicia”. Neste sentido, Carmen Pardo recordou algunhas actuacións de promoción levadas a cabo pola Xunta de Galicia como Millésime, as Rutas do Viño, porgramas de TV, Vive Galicia ou a ensamblaxe con outros recursos turísticos como o golf, o termalismo, o Camiño de Santiago ou o turismo rural.

Carmen Pardo resaltou, asemade, iniciativas como o Bono Iacobus, o Outono Gastronómico ou Vive Galicia que permiten “gozar das excelencias do turismo rural de Galicia e da súa gastronomía”. Ademais, a secretaria xeral destacou como “no caso da primeira marca turística, Galicia, gárdasme o segredo?, a enogastronomía ocupa un lugar preponderante dentro dos 10 produtos cabeceira de marca que promoven a comercialización dos recursos turísticos galegos” como é Paseando entre viñedos.

‘IV Evento Interrexional WINETech’

A secretaria xeral para o Turismo clausurou o IVevento Interregional WINETech, que Medio Rural materializa a través do Instituto Galego de Calidade Alimentaria (Ingacal), e na que colabora a Fundación Empresa Universidade Galega (Feuga), ten como principal obxectivo promover a innovación e a transferencia de tecnoloxía no sector vitivinícola, favorecendo o establecemento de relacións estables entre as empresas do sector e as entidades da súa contorna científica tecnolóxico.

Dito programa foi aprobado na primeira convocatoria do Programa de Cooperación Territorial INTERREG IV B SUDOE, cun presuposto de 1,6 millóns de euros, dos que o 75% está financiado polo Fondo Europeo de Desenvolvemento Rexional (Feder) e o resto pertence a fondos propios.