A secretaria xeral para o Turismo asinou hoxe convenios coas asociacións do sector para a implantación e difusión da marca Q de Calidade turística do Instituto de Calidade Turística Española

A Secretaría Xeral para o Turismo a través de Turgalicia asinou acordos coas asociacións de aloxamento de Turismo Rural, Axencias de Viaxes, Hoteis e Apartamentos Turísticos, Servizos de Restauración, Instalacións Náutico Deportivas e Campos de Golf para incentivar a implantación, renovación ou certificación da Marca Q de Calidade Turística.

Entre as novidades neste 2012 figura tamén a sinatura de convenios para a implantación da Q en adegas visitables e establecementos de lecer nocturno.

Ademais de asinar convenios a través de Turgalicia co sector, a Secretaría Xeral para o Turismo nas súas ordes de axudas ao sector incrementa do 40 ao 75% o máximo subvencionable para a certificación, seguimento ou renovación da marca Q nas empresas turísticas. A orde específica de 2012 para implantar e renovar as certificacións de Calidade Turística está dotada con 100.000 euros.

A secretaria xeral para o Turismo e conselleira delegada da Sociedade de Imaxe e Promoción Turística de Galicia-Turgalicia, Carmen Pardo, asinou esta mañá na sede de Turgalicia convenios coas asociacións de aloxamento de Turismo Rural, Axencias de Viaxes, Hoteis e Apartamentos Turísticos, Servizos de Restauración, Instalacións Náutico Deportivas e Campos de Golf convenios para a implantación e difusión da marca Q de Calidade Turística para o ano 2012. Como novidade, este ano os convenios asinaranse tamén con Adegas Visitables e mais cos establecementos de Lecer Nocturno.

Ademais dos convenios que se asinan con Turgalicia, a Secretaría Xeral para o Turismo establecerá unha orde de subvencións para empresas turísticas e servizos complementarios para a implantación, certificación, seguimento e renovación da marca Q de Calidade Turística do ICTE dotada cun importe de 100.000 euros. Por primeira vez este ano o máximo subvencionable pola Secretaría Xeral para o Turismo pasa do 40 ao 75% neste tipo de ordes. Ademais, todas as ordes de subvención da Secretaría Xeral para o Turismo en 2012 contemplan vantaxes para os establecementos e servizos adheridos a este distintivo.

A sinatura dos convenios cos representantes do sector empresarial turístico enmárcase no programa de apoio á implantación da marca Q de Calidade Turística para o ano 2012 de Turgalicia e inclúen unha oferta de servizo de consultoría no ámbito colectivo para as empresas e asociacións que estimen oportuno adherirse ao sistema de Calidade no Turismo. A Xunta de Galicia incentiva economicamente aos empresarios que implanten este sistema no ámbito individual soportando os custos directos das auditorías externas de certificación ou renovación da marca Q, así como a cota de mantemento do distintivo de calidade.

Comparativa Galicia e España
Galicia é a Comunidade Autónoma Española na que máis aumentaron os establecementos certificados coa Q de Calidade Turística en 2011. Tamén é a comunidade con maior número de aloxamentos certificados -106 de 771-. Por segundo ano consecutivo, Galicia é a comunidade na que máis medrou a cifra de establecementos certificados coa marca Q. Ocupamos a primeira posición no relativo a balnearios certificados -7 dun total de 38-. Galicia é a primeira CCAA en Q de Calidade Turística nas categorías de Turismo Rural, Instalacións Náuticas-Deportivas e Turismo Activo. Galicia é a segunda comunidade en Axencias de Viaxes e Palacios de Congresos – 2 dos 10 certificados existentes en España están en Galicia.

No 2003 había en Galicia 13 establecementos distinguidos coa marca Q de Calidade Turística, a cifra acadou os 234 en 2011.

TURGALICIA PRESÉNTALLE AO SECTOR TURÍSTICO O PROGRAMA DE PROMOCIÓN E DIFUSIÓN DA MARCA Q PARA 2012

A sede de Turgalicia acolleu hoxe a reunión técnica con representantes das asociacións AGATUR, FEGATUR, Pazos de Galicia, Rutas dos Viños de Galicia, AGAVI, AVIPO, AEDAVE Galicia, CEHOSGA, ASNAUGA e Asociación Galicia Destino Golf

A Xunta de Galicia, a través de Turgalicia, dependente da Secretaría Xeral para o Turismo, presentou hoxe aos representantes do sector empresarial turístico o programa de apoio á implantación e difusión da marca Q, de Calidade turística, para o ano 2012.

Na xuntaza estiveron presentes responsables das asociacións de empresarios de Turismo Rural: Asociación Galega de Turismo Rural (AGATUR), Federación Galega de Turismo Rural (FEGATUR) e Pazos de Galicia; axencias de viaxes: Asociación Galega de Axencias de Viaxes (AGAVI), Asociación Galega de Axencias de Viaxes de Pontevedra (AVIPO) e a Asociación Empresarial de Axencias de Viaxes de España en Galicia (AEDAVE); a Confederación de Empresarios de Hostelería de Galicia (CEHOSGA); a Asociación Náutica de Galicia (ASNAUGA); a Asociación Galicia Destino Golf; e representantes das Rutas dos Viños de Galicia.

No encontro detalláronse as accións que se levarán a cabo desde a Xunta de Galicia para implementar a implantación da marca Q en Galicia, así como a súa promoción e difusión.

Consultoría e apoio económico

As accións que levará a cabo a Administración galega para fomentar a difusión da marca Q de Calidade turística en Galicia céntranse na oferta dun servizo de consultoría no ámbito colectivo para as empresas das asociacións que estimen oportuno adherirse ao sistema de calidade no Turismo.

Por outra parte, a Xunta de Galicia incentivará economicamente aos empresarios que implanten este este sistema no ámbito individual soportando os custos directos das auditorías externas de certificación ou renovación da marca Q, así como a cota de mantemento do distintivo de calidade.

Convenios co sector

Neste sentido, Turgalicia anunciou a renovación para 2012 dos convenios de colaboración coas asociacións de aloxamento en Turismo Rural, axencias de viaxes, hoteis e apartamentos turísticos, servizos de restauración, instalacións náutico deportivas e campos de golf.

Ademais, como novidade, para o este ano 2012 está prevista a sinatura de dous novos convenios de colaboración entre a Xunta de Galicia e o sector industrial –no ámbito das adegas visitables- e do lecer nocturno.

Polo que respecta aos convenios entre a Administración galega e as asociacións do sector turístico, as achegas totais distribuiranse nun 70 por cento, por parte da Xunta de Galicia, e nun 30 por cento por parte das asociacións.

Achegas da Secretaría Xeral para o Turismo

Por outra parte, a Secretaría Xeral para o Turismo establecerá unha liña de subvencións a establecementos de turismo rural, hoteis e vivendas turísticas, acampamentos, axencias de viaxes, cafeterías, bares, restaurantes e empresas de servizos turísticos complementarios para a certificación, seguimento e renovación das correspondentes normas UNE, ao obxecto da obtención ou mantemento da marca Q de Calidade turística outorgada polo Instituto para a Calidade Turística de España (ICTE).

Deste xeito, serán subvencionables os custos de auditoría externa de certificación e os derivados dos dereitos de uso da marca Q.

Ademais, ao obxecto de potenciar a difusión da marca Q en Galicia, todas as ordes de subvención de axudas económicas que dite a Secretaría Xeral para o Turismo en 2012 contemplan vantaxes para os establecementos e servizos adheridos a este distintivo de calidade.

Nesta xuntanza, fíxose tamén un repaso histórico á implantación deste sistema de calidade en Galicia, explicando que no ano 2003 só había 13 establecementos e servizos turísticos certificados co Q en Galicia, mentres que a finais do ano 2011 foron 234 os que puideron lucir este distintivo de calidade turística.

O TITULAR DA XUNTA PRESIDIU O ACTO DE RECOÑECEMENTO AOS ESTABLECEMENTOS CERTIFICADOS CO Q DE CALIDADE TURÍSTICA

Feijóo destaca a aposta da Xunta pola calidade como eixo da política turística reflectida nunha nova lei para o sector, no plan de acción do turismo de Galicia, nos 14 xeodestinos e nas axudas para acadar a certificación “Q”.

Amosa a satisfacción de que, por segundo ano consecutivo, Galicia sexa a primeira comunidade que máis certificados Q de Calidade Turística ten conseguido .

Afirma que unha alternativa baseada na fidelización, na oferta dun produto diferenciado, de calidade é a mellor garantía para consolidar a nosa oferta “neste sector clave da economía” .

Destaca que o turismo supón para Galicia case o 11% do PIB, máis de 100.000 empregos, o 11% da poboación activa da comunidade.

“Non abonda con ofrecer unha ampla diversidade de servizos, hai que ofrecer os mellores”, di, e felicita “aos 234 emprendedores que entenderon a mensaxe”.

O presidente do Goberno galego, Alberto Núñez Feijóo, destacou  a aposta da Xunta pola calidade como eixo da política turística reflectida nunha nova lei para o sector, no Plan de Acción do Turismo de Galicia, nos 14 xeodestinos e nas axudas para acadar a certificación Q.

“Esta aposta por cambiar cantidade por calidade foi un dos eixes da política turística da Xunta. Primeiro, impulsamos unha nova lei para o sector, que lle dera as maiores garantías e que regulara a calidade. Segundo, impulsamos un Plan de Acción do Turismo de Galicia 2010-2013. Despois, sinalamos os 14 xeodestinos na comunidade e abrimos unha liñas de investimento para que os establecementos que quixeran apostar pola calidade e pola certificación Q o puideran facer”, explicou Feijóo, durante o acto de recoñecemento Q de Calidade Turística en Galicia, que tivo lugar no Balneario de Augas Santas en Pantón.

Nestes momentos de crise, o presidente autonómico recoñeceu que hai razóns para mirar con certo optimismo ao sector turístico, “que está a saber adaptarse –dixo- á actual conxuntura para ofrecer a súa mellor cara, o seu rostro máis competitivo”. “Galicia gozou dun excelente Ano Santo Xacobeo no 2010. O mellor Ano Santo da nosa historia. E en 2011, aumentamos a cifra de visitantes”.

Ao longo da súa intervención, Feijóo resaltou que o turismo supón para Galicia case o 11% do PIB, máis de 100.000 empregos, o 11% da poboación activa da comunidade; “é –aseverou- un dos piares básicos da economía galega e española, que foi transformándose ao longo das últimas dúas décadas, e agora encóntrase na encrucillada da crise, no momento da toma de decisións para elixir o camiño correcto que conduza canto antes á saída deste pozo que é a crise económica”.

Neste sentido, o titular da Xunta afirmou que “a clave chámase calidade”. “Que a alternativa veña da man da fidelización, da oferta dun produto diferenciado, de calidade é a mellor garantía para consolidar a nosa oferta neste sector clave da economía”.

Feijóo amosou a satisfacción de que, por segundo ano consecutivo, Galicia sexa a primeira comunidade que máis certificados Q de Calidade Turística ten conseguido. “Constatar este feito é un gran recoñecemento á labor das máis de 100.000 persoas que traballan no sector turístico galego”.

O presidente da Xunta concluíu reiterando que “non abonda con ofrecer unha ampla diversidade de servizos, hai que ofrecer os mellores”, e felicitou aos 234 establecementos, “aos 234 emprendedores que entenderon a mensaxe”.

Coidar o liderado de Galicia no sector turístico
Pola súa banda a secretaria xeral para o Turismo, Carmen Pardo, resaltou que en Galicia, somos líderes no sector de Instalacións Náutico Deportivas (o 50% das existentes en España están en Galicia, 6 de 12); e somos líderes no sector de Turismo Activo, tamén co 50% das empresas certificadas existentes no Estado (4 de 8). Segundo explicou Pardo, seguimos a ser a primeira comunidade española en establecementos rurais certificados –en total temos 60 dos 216 existentes, o que significa un 27,7% do total- e tamén lideramos a cifra de certificacións no sector Balneario (7 dos 38 balnearios certificados están aquí, o que significa un 18,4%). Do mesmo xeito, Galicia é a comunidade con maior número de aloxamentos turísticos certificados- hoteis, casa de turismo rural e acampamentos-. En total, 106 dos 771 de toda España están en Galicia.

Segundo comentou a secretaria xeral, por primeira vez desde a Administración autonómica se promoveu unha orde específica en 2011 por valor de 300 mil euros, dirixida a establecementos de turismo rural, hoteis, hoteis-talaso e balneario, balnearios, cafeterías, bares, restaurantes, pazos de congresos e empresas dedicadas ao turismo activo co obxecto de implementar as correspondentes normas UNE que conduzan á certificación da marca Q de Calidade Turística do ICTE. A Xunta ten, xa que logo, unha orden específica dentro das axudas ao sector dirixida a implantar e renovar as certificacións Q de Calidade Turística.

Así mesmo, Carmen Pardo explicou que todas as ordes de axuda da SXT conteñen discriminación positiva para o Q. Están dirixidas á potenciación e mellora do sector e contemplan dentro dos criterios de valoración que o establecemento solicitante acredite o seu compromiso coa calidade turística: acreditando certificación da Marca Q ou a súa adhesión ao ICTE, así como o distintivo de Boas Prácticas de Compromiso de Calidade Turística concedido por un destino SICTED na C.A. de Galicia; ou unha certificación de calidade ambiental internacionalmente recoñecida ou ben una certificación de calidade en accesibilidade conforme á norma internacional ISO 170001.

A secretaria xeral comentou que “todos sabemos que o apoio institucional ao sistema de calidade é un dos investimentos máis rendibles porque incide na transformación cualitativa dos negocios turísticos; redunda na satisfacción dos clientes; e reverte na fidelización do destino”. E engadiu que “o traballo na mellora da calidade do destino turístico Galicia é un esforzo de todos e polo tanto é un logro que todos debemos compartir”. Parafraseando a Jim Rohn, Pardo rematou animando aos empresarios a seguir colaborando e esforzándose por facer de Galicia un destino de calidade e recalcando que “para ser exitoso non hai que facer cousas extraordinarias, senón facer cousas ordinarias pero extraordinariamente ben”.

A secretaria xeral para o Turismo recibe o premio do Instituto da Calidade Turística de España pola difusión da marca Q

Carmen Pardo destacou na súa intervención que Galicia é, por segundo ano consecutivo, a Comunidade Autónoma española na que mais aumentaron os establecementos certificados coa Q de Calidade Turística en 2011.

No stand de Galicia en Fitur celebráronse hoo venres as presentacións de Turismo Rías Baixas; As Pontes; o Plan de Dinamización do Produto Turístico Área Metropolitana de A Coruña; e mais as novas iniciativas turísticas do Consello de Ferrol.

A secretaria xeral para o Turismo, Carmen Pardo, recibiu o premio outorgado polo Instituto da Calidade Turística de España, ICTE, á Comunidade Autónoma de Galicia polo seu traballo a prol da difusión da marca Q, de Calidade turística ao longo do ano 2011.

Carmen Pardo, asistiu o venres 20 de xaneiro ao acto de entrega anual das certificacións Q de Calidade Turística, que se celebrou no marco de Fitur. Na súa intervención, a secretaria xeral resaltou que Galicia é a Comunidade Autónoma española na que máis aumentaron os establecementos certificados coa Q de Calidade Turística en 2011, cun balance de 43 novas incorporacións ao longo dos últimos doce meses. Galicia conta deste xeito con 243 empresas turísticas nas que xa loce o distintivo Q. Carmen Pardo tamén recalcou que Galicia é a comunidade autónoma con maior número de aloxamentos turísticos certificados (hoteis, casas de turismo rural e acampamentos turísticos). En total, 106 dos 771 de toda España están en Galicia.

A nosa comunidade ocupa tamén a primeira posición no relativo a balnearios certificados -7 dun total de 38-; a instalacións náutico-deportivas -6 de 12-; e a empresas de turismo activo -4 das 8 existentes con certificación Q de Calidade Turística están en Galicia-.

Por segundo ano consecutivo, a nosa é a comunidade na que máis medrou a cifra de establecementos certificados coa marca Q. Somos a segunda comunidade en canto a axencias de viaxes e palacios de congresos certificados. Contamos con 56 axencias con certificación sobre as 380 que a teñen en todo o Estado; e con dous palacios sobre os 10 existentes en España con Q de Calidade Turística.

Carmen Pardo resaltou que na actualidade dende a Administración Turística galega trabállase en Programas de Calidade Turística nos subsectores turísticos de hoteis, turismo rural, restaurantes, axencias de viaxes, acampamentos turísticos, balnearios, servizos de restauración, espazos naturais protexidos, praias, palacios de congresos, turismo activo e instalacións náuticas. Do mesmo xeito, a secretaria xeral comentou que as actuacións relativas ao estímulo ás iniciativas de certificación e acreditación da calidade xa estaban presentes no Plan de Acción do Turismo 2010-2013 dentro da política de productos e da estratexia de xestión de productos do plan.

A secretaria xeral resaltou tamén que dende Turismo se puxeron en marcha dúas ordes de subvencións específicas –na anualidade 2011 e mais na 2012- para implementar as normas UNE que conduzan á certificación da marca Q de Calidade Turística do Instituto para a Calidade Turística Española. “Temos unha orde específica dentro das axudas ao sector dirixida a implantar e renovar as certificacións Q”, comentou. Carmen Pardo tamén destacou a colaboración do sector para situar ao destino Galicia nunha das primeiras posicións de España en canto a Calidade Turística.

Proxecto Discamino
Un pai e o seu fillo de 12 anos con parálise celebral percorrerárn o Camiño dende Roncesvalles ata Santiago nunha silla de rodas-bicicleta Duet. Este proxecto presentouse hoxe en Fitur no Stand da Rede Española de Turismo Accesible-Red Estable e levarase a cabo entre o 25 de xuño e o 15 de xullo deste ano. O obxectivo de Javier Luque e mais do seu fillo Antonio, naturais de Córdoba, é contribuir á rehabilitación do rapaz proporcionandolle variados estímulos multisensoriais, así como facer un chamamento sobre a necesidade dun turismo accesible.

A secretaria xeral para o Turismo, Carmen Pardo, recibiu a Javier Luque e ao seu fillo o venrs 20 de xaneiro no stand de Galicia en Fitur. Alí amosáronlle a bicicleta adaptada que conseguiron para realizar o percorrido.

Programa do Stand de Galicia

O venres, o stand de Galicia acolleu catro presentacións relacionadas coa oferta turística da comunidade. Turismo Rías Baixas, realizou unha presentación sobre as Rías Baixas como destino competitivo e de calidade. A secretaria xeral para o Turismo, clausurou o acto de presentación de Rías Baixas –segundo dixo “un dos destinos turísticos máis importantes de Galicia”- xunto co presidente da Deputación de Pontevedra; Rafael Louzán. Carmen Pardo animou aos alcaldes da zona a seguir traballando polo destino e aos asistentes a coñecer e disfrutar das Rías Baixas.

Tamén fixeron presentacións o Concello de As Pontes e o Plan de Dinamización do Produto Turístico Área Metropolitana da Coruña. A programación do stand pechouse coa presentación das novas iniciativas turísticas do Concello de Ferrol.

GALICIA É A COMUNIDADE AUTÓNOMA NA QUE MÁIS MEDRARON OS ESTABLECEMENTOS CERTIFICADOS COA MARCA Q DE CALIDADE TURÍSTICA

A Comunidade Autónoma de Galicia pecha o ano con 234 empresas turísticas con este distintivo: 44 hoteis, 60 establecementos de Turismo Rural, 7 balnearios, 2 cámpings, 2 pazos de congresos, 9 praias, 43 servizos de restauración, 56 axencias de viaxe, 4 empresas de Turismo Activo, un campo de golf e 6 instalacións náutico-deportivas.

Galicia é a comunidade autónoma española na que medraron máis ao longo deste ano 2011 o número de establecementos e servizos turísticos certificados coa marca Q de calidade turística. Deste xeito, ao longo dos últimos doce meses houbo 43 novas incorporacións, o que supón que o territorio galego teña xa 234 empresas turísticas con este distintivo.

 Neste sentido, é importante destacar que Galicia é a comunidade autónoma con meirande número de aloxamentos turísticos (hoteis, casas de Turismo Rural e cámpings) certificados, cun total de 106 dos 771 que hai en toda España. Galicia é ademais o territorio con máis establecementos rurais certificados (60 de 216 do total español), o que significa un 27 por cento do conxunto estatal.

 Balnearios e instalacións náutico-deportivas

Asemade, Galicia tamén é líder en balnearios certificados coa marca Q, con 7 distinción  do total de 38; instalacións náutico-deportivas, 6, dun total de 12; e empresas de Turismo Activo, 4, dun total de 8, o que supón o 50 por cento do ámbito español.

Polo que respecta ás axencias de viaxe, Galicia e a segunda comunidade autónoma que conta con máis empresas certificadas, 56 sobre un total de 380 no ámbito español; así como no subsector dos pazos de congresos, onde están certificados 2 establecementos dun total de 10.

Na actualidade, estanse a desenvolver en Galicia programas de calidade turística, dentro da marca Q nos subsectores turísticos relativos a hoteis, Turismo Rural, restaurantes, axencias de viaxes, cámpings, balnearios, servizos de restauración, espazos naturais protexidos, praias, axencias de viaxes, pazos de congresos, Turismo Activo e instalacións náuticas.

Galicia pecha o ano con 44 hoteis, 60 establecementos de Turismo Rural, 7 balnearios, 2 cámpings, 2 pazos de congresos, 9 praias, 43 servizos de restauración, 56 axencias de viaxe, 4 empresas de Turismo Activo, un campo de golf e 6 instalacións náutico-deportivas certificadas coa marca Q.

A adhesión e participación no Sistema de Calidade Turística Española é totalmente libre e voluntaria e pode ser solicitada en calquera momento. Non se precisa máis que a vontade do empresario e o seu compromiso de seguimento e continuidade internos. Para obter o distintivo Q, a empresa, unha vez adherida ao Sistema, debe seguir o proceso de implantación segundo as características da súa organización, contando coa asistencia técnica e os apoios precisos. En Galicia, o Sistema de Calidade Turística de España está representado pola Consellería de Cultura e Turismo, a través de Turgalicia, da Secretaría Xeral para o Turismo.

A estratexia da marca turística Q consiste en dotar ás empresas do sector turístico español dun sistema de xestión e mellora da calidade de produtos e servizos que lles permitan crean unha vantaxe competitiva axeitada aos novos retos do mercado, e conseguir así o recoñecemento da imaxe de marca de España como destino de calidade.